In sos tempos colaos
«Su Monte» nugoresu,
de granitos superbu,
chin milli puntas luchidas de sole,
si nabat Orthovene,
ca de benas fit riccu,
e riccu fit de chercos,
d’éliches seculares,
de suberjos, de rosas de mudrecu,
de sirbones e d’erbas profumadas.

Tando bi fin sas fadas
chin sa fardetta longa e-i su curcuddu,
in «Sa Conca», in «Borbore», in «Bajupala»,
ch’azzudaban sos ómines
a bocare s’iscrotza
e a facher carbone.
Sas funtanas, tra lidones e chessas,
cantaban a murmuttu,
paris chin sos puzones,
cantoneddas galanas.
Sa zente, affainada,
nd’intendfat serena
s’arcana melodia
chi nutrìat su coro.
Su sirbone, aggroddau,
abbarrabat chiettu,
e non moghiat foza.
In iberru, cando sas camineras
fin bene ricamadas
chin su pinzellu tintu ‘e ghiddighìa,
sos pitzinnos, iscurtos,
andaban a collire
sa lande prò sos porcos,
e fachian de tottu prò colare
ube b’est s’aschisorju, su tesoro,
prenu ‘e marengos d’oro, in «Mamudine»,
lestros, a manu tenta,
timende a si bortare
non lis seret essfu su pantarma,
su pantarma ‘e su re
chin su cane famìu.
Tando «Su Monte» nostru
fit unu paradisu.
Commo l’an tottu lintu
chin limbas de catramu,
e l’an peri iscrombau
chin costanas de làmia, allorilladas
che bestire pedìu.
In artu, in s’atta, bellu, a cara a bidda, b’amus su «Redentore».

Ma «Su Monte» ub’est Issu, commo abbéru paret unu mannaie uscrau a friscu.
Mancu santu Frantziscu
chi est santu baiente
e chi connoschet zente
at fattu su miràculu.
Alluttu che papiru,
a mantzas che runzosu,
sichit «Su Monte» nostru a fummiare.
S’amore chi unu tempus
bolabat in sas àgheras galanas
chin alas de cuffortu, non b’est prusu.
Commo rundat in terra
su male chin sas ungras de sa morte,
chi gruspit cada bonu sentimentu,
frazzicande s’affetta intro ‘e su coro.